श्री संत सद्गुरू ब्र परमपूज्य श्रीराम महाराज जांभरूणकर रचित श्री गणपती स्तोत्र

श्री गणपती स्तोत्र

जय जयाजी मंगलमूर्ति ।
नमन असो तुम्हा प्रती ॥
सुबुद्धी द्यावी मज निश्चिती ।
गौरी नंदना॥१॥
प्रत्येक कार्यात नाम तुझेच। घेणे लागे साच॥
सिद्धीस जाय कार्य आपोआप॥
 मायबापा गणेशा॥२॥
ॐकार स्वरूप तुझेच रूप ।
नच भेदाभेद तो अमुप॥
सर्वांभूती भरून उरला साच।
देवा लंबोदरा तुम्ही॥३॥
तुम्हा नमस्कार असो वारंवार।
शिर ठेवून चरणांवर ॥
तुच माझा आधार।
सर्वस्वी गणराय ॥४॥
भाव भक्ती प्रेम विश्वास ।
नामाचा अखंड तो ध्यास॥
कार्य जाय सर्व सिद्धीस।
देवा गौरी नंदना ॥५॥
देवा दिकांनीही तुज पुजिले।
तयालाही यश प्राप्त झाले॥
अपयश नच आले ।
तव कृपेकरोनिया ॥६॥
येता शुक्रवार दिन।
पुजावा गौरी नंदन ॥
शोडषोपचार करून ।
भाविकाने ते विबुध हो ॥७॥
आणिक वृत्त संकष्ट चतुर्थी ।
चंद्राची पुजा करावी ती ॥
वहाण्या दूर्वा आरक्त पुष्पे ती।
आणि दिप तो तुपाचा॥८॥
नैवेद्यास मोदक तो एकशे आठ ।
ओम मम मंत्र हा सुभट॥
जपावा तो अचाट।
टळेल सर्व ही संकट ते सत्य सत्य त्रिवाचा॥९॥
मन करावे स्थिर ।
ध्यानी घ्यावा लंबोदर॥
स्वार सदा तो मुषकावरी।
गौरी नंदन हा॥१०॥
सोंड असे अति छान।
सुर्पाकार जयाचे कर्ण॥
तशी शेंदराची उटी मनोहर।
असे जयाची अंगी सर्व काळ॥११॥
सुवर्ण करगोटा तो कमरेसी।
आणि यज्ञोपवीत निश्चिती॥
पिवळा पितांबर यथार्थ।
असे देवराया तुज॥१२॥
असे विष्णूचा अवतार।
भेदाभेद नच माना तिळभर॥
अद्वैत स्वरूप निरंतर।
नाम जयाचे विघ्नराज ते॥१३॥
इतकीच देवा कृपा करणे।
सर्वास सुबुद्धी देणे॥
आणिक ती सेवा घेणे।
भोळ्या भाविक भक्ताकडूनी॥१४॥
डाव्या सोंड्या गणपती।
असावा भाविक हो पुजे प्रती॥
अपयश नच ये कल्पांती।
ऐसी वाणी व्यास ऋषींची॥१५॥
शुक्रवारी वाहणे गुळ फुटाणे।
सर्वही दुर पळती संसारातील कुटाने॥
ऐसे सांगुन गेले संतजण शहाणे।
आपणालामूनी ते॥१६॥
करा मनोभावे नमस्कार ।
इच्छिले ते पुरवी गौरीकुमार॥
अनुभव घ्या तुम्ही खरोखर ।
ठेऊन विश्वास आपल्या मनी तो॥१७॥
माघ मास सुंदर।
तसा दिन सोमवार॥
तारीख एकविस इसवी सन 2000 ।
असे तिथी उत्तम द्वितीय ती॥१८॥
सहज बुद्धि दिली म्हणून।
हे स्त्रोत्र झालेसे निर्माण॥
गजानन कृपेकरून।
भाविक जन हो॥१९॥
हेच मागणे तुज सर्वकाळ।
तव नाम वदनी असो निश्चळ॥
नाम प्रतावे पळे काळ।
असे महिमान नामाचे॥२०॥
जे लिहीले आपल्या दैवात।
ते ते होय आपणा प्राप्त॥
अखेर स्मरत प्रभू गणनाथा।
ऐसे महिमान नामाचे॥२१॥
इतिश्री गणेश स्तोत्र।
परम अति पवित्र॥
करता करविता गौरीकुमार।
देवाधिदेव प्रभू तो॥२२॥
इति श्री दास गणूचा वेडा राम्याकृत गणेश स्तोत्र संपूर्ण................!!!!!